E wiitere Höheponkt zom Schloss (29.05. - 30.05.2017)

Mittwoch, 31.05.2017

29.05.17

Höt esches sowiit: Mer wächslid s'letzte mou d'Onterkonft ond fahrid vo Visalia rechtig Yosemite Nationalpark. Öbernachte wärdemer chorz vorem Park ide Cedar Lodge in El Portal. De Yosemite Nationalpark bestecht dor sini schöne Flöss, die grosse Wasserfäll, saftigi Wiese ond höche Fälswänd. Mer hend es paar Täg vorhär no metöbercho, dass Höt Memorial Day esch ond Feriebegenn vode Amerikaner. Mer hend öis auso ufs Schlemmschte igstöut, wöu de Yosemite söscht scho met Bsuecher öberloufe esch. Nochem chorze Check-in is Hotel hemmer üs ufgmacht i Park. Wöus scho Nomitag gseh esch womer im Park acho send, hemmer vergäbens öberne Stond e Parkplatz gsuecht. Mer hends de för Höt ufgäh ond entschede, dasmer Morn Morge früeh die 1. wärdid sii im Park (abgseh vo dene 1000e vo Camper ;-)). Mer send de im Städtli Mariposa no öpis go ässe ond hend de Obe gmüetlech im Hendergärtli vom Hotel metere chorze Rondi Blackjack (wedermou ohni Isatz ;-)) loh usklenge.

Wätter: Sonnig, heiss, ca. 30 Grad

zroggleiti Strecki: 240 Mile

Yosemite NP

30.05.17

S'letzt mou Höt Morge hemmer öisi Wandersache packt ond s'Rocksäckli agleid damet mer am haubi 7ni im Park achömed. Siehe da: Mer hend sogar no e riesigi Uswahl a Parkplätz gha. Lüüt heds noni wörkli sehr vöu ome gha, die einzige wo scho de Grill bedient hend, send Reh ond Hersch gseh wo d'Räschte vom Grill gschläckt hend. Pönktlech metem 1. Shuttlebus semmer zom Stopp för a Vernal Fall gfahre. Geschder hemmer öbrigens dorne fröndlechi Burger King Metarbeiteri erfahre, dass de Yosemite sett 11 Johr nömme so vöu Schmöuzwasser gha hed we im momänt. Drom send alli Wasserfäll ond Flöss no gigantischer as söscht scho. Mer send de auso vom Bus Stopp rechtig Vernal Fall gloufe ond je nöcher dasmer cho send, desto nässer semmer worde (Am Morge am 8i ond no ohni Sonne wäremer froh gseh omne Rägejagge ;-)). Zemli onterchüut semmer denn zrogg ond hend öis es sonnigs Plätzli gsuecht zom tröchne.

Aschliessend semmer metem Bus wiiters rechtig Mirror Lake. Dette hemmer e 8 Km lange Roundtrip ome See gmacht. Wöu onterwägs ofgrond vo dem velle Wasser e teil vom Wäg öberfluetet gseh esch, hemmer improvisiert ond send zerscht barfuess dörs iiiiiiischaute Schmöuzwasser gloufe. Wöumers barfuess fascht ned usghaute hend dor das chaute Wasser, hemmer öis de entschede glich d'Schue azlegge ond Zähnd zämezbiesse. Leider heds das ned vöu besser gmacht, wöu s'Wasser jo ide Schue enne blobe esch ;-). Womer de zwöschedenne sogar no e Bäretatzeabdrock gseh hend im Schlamm, wo zemli frösch usgseh hed, semmer bäreglögglilüütend ond met Stei ond Stock bewaffnet imene schnöue Schrett devoghuscht. Mer send de alli froh gseh, womer weder trochne Bode onder de Füess gha hend ond öis ou weder Lüüt entgäge z'loufe cho send. Noch dem Adrenalinschub hemmer öis de es schöns Plätzli gsuecht am Floss om de Pols z'sänke ond öpis z'ässe. Wöumer noch dere Wanderig relativ lang uf öise Shuttlebus gwartet hend ond mer no öpis "rechtigs" hend wölle ässe, hemmer bim Village Restaurant no e Stopp igleid ond öises standardmässige Fast-Food no inedröckt ;-). Wöumer Höt Obe no mönd packe, ichecke, Blog schriibe semmer nochhär weder rechtig Hotel gfahre.

Wätter: Sonnig, ca. 28 Grad

Siehe überfluteter Weg ;-) Bäretatze (ned s'Guetzli)

--------------------------------------------------------------------------------------------------------------------------------------------------------------

Das esch leider scho öise letzti Bloggitrag, wöu Morn Obe am 20.00 flügemer vo San Francisco weder retour uf Zöri.

Mer send dankbar dasmer so velles hend döffe gseh ond erläbe wo velli anderi gar ned d'Möglechkeit hend dezue. Die velle Begägnige met de verschedenschte Tier i freier Natur send för öis ned säubschtverständlech ond ghöred secher zode grosse Highlights vode Ferie. Mer hend so vöu verschedeni Nationalpärk döffe bsueche ond jede hed sine eiget Charme ond esch uf sini eiget Art wonderschön ond einzigartig. Mer send dankbar, das alli vo öis vier nie chrank oder verletzt gseh send, dasmer nie e Panne gha hend metem Outo ond das wörkli alles emmer riebigslos fonktioniert hed. Mer hend öis emmer erfröit öber d'Offeheit vode Lüüt wo öis begägnet send.

Zu guter letzt dankemer i aune wo fliessig öise Blog metverfougt hend ond mer hoffid ehr hend öich ou echli chönne fühle we ide Ferie oder chönnd för öichi zuekönftige Ferie ond Reise no öpis drususe näh. :-)

Hang loose & Thank you!

Milli, Chris, Martina & Larissa

So tüüf semmer nonie gsonke - 85.5 m.u.M. (26.05.17-28.05.17)

Montag, 29.05.2017

26.05.17

 

Nochdem mer de geschdrig Obe gmüetlech am Pool ond metere chorze Rondi Black Jack im hoteleigene Casino verbrocht hend, hemmer eus höt ofe Wäg gmacht is Death Valley met vöu Wasser im Outo. Mer hend üs äxtra früeh ufgmacht, damet Temperature no einigermasse erträglech send. De Wätterbrecht hed om die 40 Grad vorus gseit. Als erschts hemmer diräkt de tüüfschdi Ponkt vode USA agstüüret, s Badwater Basin (85.5 Meter onderem Meeresspiegu) ond de heissischt Ponkt vode USA. Mer send scho denn froh gseh hemmer so vöu Wasser debie gha, wöu d Loft so troch gseh esch. Mer send quer dörs Death Valley gfahre, denn hemmer e chorze Zwöschestopp bide Sanddüüne gmacht. Mer hend eus s’Death Valley vöu sandiger ond ned so högelig vorgstöut. Bim längere dorab fahre, semmer zomene zwöite Zwöschestopp zwonge worde. Brämse hend agfange komischi Grüsch mache ond s Outo hed afoh stenke…I dere Ziit wo Brämse abküehlet hend hemmer liecht nervös d'Ussecht echli gnosse. Mer hend denn aber nocher ohni Problem chönne wiiter rechtig Bakersfield fahre, wo euses nöchschte Hotel «Quality Inn» gwartet hed. Mer freued eus jetz scho ofs letschte Zmorgebuffet Morn Morge, wo im Hotelpriis debii esch.

 

Wätter: Sonnig, heiss, ca. 40 Grad

 

Zroggleiti Strecki: 370 Mile

 

Badwater-Basin Death Valley Sanddünen Death-Valley Death Valley

 

27.05.17

 

Met grossem Honger hemmer eus rechtig Zmorgebuffet begäh. Als erschts send eus die met Plastikgscherr ond Ässensräschde öberföute Tesch ufgfalle. Nichts ahnend hemmer eus welle met Täller ond Bsteck idecke ond hend gmerkt, dass mer anschiinend z vierte es Mässer mönd teile. Nichts desto trotz semmer positiv blobe ond wiiter zode warme Grecht. Ou Do esch eus grossi Lääri entgägecho. Liecht frogend hemmer usschou ghaute noch öbis ässbarem. Mer hend eus de schlossändlech met es paar Toastschiebe mösse z frede gäh (Ufschnett ond Chäs esch bede Amis bim zMorge eh es Frömdwort). ;-)

 

Euses hötige Ziel esch de Sequoia Nationalpark. Wie emmer gämmer eusi Ziel im Navi i. Azeigt heds eus 2h Fahrtziit. Öppe 20 km vor Akonftsziit esches eus spanisch vorcho, das nonie e Wägwiiser vom Nationalpark cho esch. Mer send zwor im Sequoia National Forrest gfahre, aber hend vom Nationalpark wiit ond breit no nüd gseh. Mer hend de im Navi mou nochegluegt ond festgstöut, das mer de Ort Sequoia statt de Nationalpark igäh hend. Us 2h Fahrziit send denn 5h worde. Emmerhe d hed öis die Fahrt dor schöni Natur gfüehrt, womer söscht ned gseh hättid ;-).

Im Park acho hemmer schnöu gmerkt dases Wochenänd esch ond vöu Lüüt hed. Wöu Ziit nömme för meh glänget hed, semmer de met de Shuttlebüs no zom Moro Rock gfahre. Dä hedmer metem Outo ned säuber chönne afahre ond leider esch d Organisation met dene Büs ned so top gseh, ond drom hemmer de dette nomou vöu Ziit verlore. Zom Glöck hemmer Morn no de ganz Tag plant zom de Sequoia z’besechtige. Wäg dem semmer nochhär hei rechtig Hotel "Lamp Liter Inn" in Visalia gfahre.

 

Wätter: Sonnig, warm, ca. 24 Grad

 

Zroggleiti Strecki: 255 Mile

 

28.05.17

 

Neuer Tag, neues Glück. Drom semmer Höt Morge be Ziite ufgstande, hend öis för Tagesverpflegig im Supermarkt es chlises Picknick kouft ond send die ca. 80 Kilometer i Sequoia Nationalpark gfahre. Dä esch bekannt för sini riesige Mammutböim ond i dem Park läbid sogar Schwarzbäre. Mer hend gwösst dasmer Höt chli wönnd wandere, drom hemmer auso eusi beide Bäreglöggli debii gha, wöumer ned ombedengt dra interessiert send, imene Bär diräkt öbere Wäg zloufe. Wöus Geschder metem Shuttlebus ned so klappet hed, hemmer öis Höt entschede, s’Outo loh z'stoh ond Höt alles z’Fuess z'besechtige. Mer hend de gstartet metem Big Tree Trail, wo e sehr schöne chorze Rondwäg gseh esch.

 

Nochhär eschs wiiter gange zom gröschte Mammutboum vode Wäut, de General Sherman Tree (Höchi: 84 Meter, Dorchmässer: 11 Meter, Omfang: 31 Meter, Alter: 2’300 Jährig). Onterwägs hemmer die wonderschöni Natur ond die velle andere grosse ond schöne Mammutböim gnosse. Ufem Röckwäg hemmer de doch gfonde, dasmer öisi Bäreglöggli mou «Stomm» schaltid. Emmerhe wärs doch scho geniau, wemmer doch no e wöude Bär wördid gseh, natürlech emmer metem nötige Secherheitsabstand ;-). Leider esch öisi Wanderig emmer meh z’Änd gange ond niene hed sech e Bär zeigt…Bis etz: 0.7 Mile bevor mer weder bim Outo acho send, hemmer plötzlech e Mönscheasammlig beobachtet, wo alli am fötele ond föume gseh send. Mer hend gstuunet, dass die alli de glich Mammutboum am fötele send. So speziell esch jo etz dä ou ned. Womer nöcher cho send ghöremer vo allne Siite: Pssssst. A bear..Do hemmerne aso gha. E Adrenalinschuub esch dör öise Körper gschosse ond mer hend afo sueche. Lang esch nüt meh gange, bismer de plötzlech vom Boum obe abe 2 Baby-Bäre gseh hend abechlättere. Wo Baby-Bäre send, esch ou e Mama-Bär, hemmer öis dänkt. Chorz drufabe esch de Big-Mama ou no förecho. Wie imene Doku-Föum hemmer nochhär i de Babys bem frässe ond spele zuegluegt ond beobachtet, we d’Muetter die ganz Ziit es Oug uf sie hed.

 

Öisi Wanderig hätt auso ned besser chönne Ände ond so semmer de nochhär weder zrogg zom Outo gloufe. Chorz vorem Outo hemmer es luuts "Knacke" ghört. E abgstorbne Ascht vomene Mammutboum esch met voller Wocht genau i dem Momänt ufe Bode gstörzt, zom Glöck met secherem Abstand vo üs. Do hemmer nomou gmerkt, wie gigantisch die Riese send.

 

Wätter: Sonnig, ca. 28 Grad

 

Sequoia NP Sequoia Big Tree Trail Mammutbaum Sequoia NP Mormeli im Sequoia NP Mama-Bär Baby-Bears Mama-Bär

 

See you soon,

 

Milli, Chris, Martina & Larissa

Viva Las Vegas (22.05. - 25.05.2017)

Donnerstag, 25.05.2017

22.05.17

Höt Morge hemmer plant gha, sämtlechi Öbernachtige för die letzte Täg uf öisere Reis zbueche, damet mer öis nochhär nömme drom mönd kömmere. Wöu leider s Internet im Hotel natürlech grad do gstreikt hed, semmer nochem Check-Out diräkt i nöchst Mc Donald's ghocket ond hend dette öbers WLAN alli Onterkönft chönne problemlos bueche. Aschliessend semmer los rechtig Las Vegas, wo öise 1. Halt im Outlet Center North gseh esch. Dette hemmer öis weder ufteilt ond hend sehr erfougriich 5 Stond lang alli Markeläde abklapperet. Mer send alli chli is Chouffieber cho ond hend öis chli mösse brämse, emmerhe hemmer alli nor 1 Koffere zom hei flüge ;-) Mer wärdid aber s Maximaugwecht secher uslote! ;-) Öbrigens send d'Martina ond d'Larissa währeddem shoppe secher 3x im Nick Carter begägnet ond hends s 1. Mou chum chönne gloube. (Wem de Name nüt seid: Dä esch es Metgled vode Backstreet Boys ;-)). Leider hemmer üs ned trout ehn omnes Föteli zfroge wöuer met Chend ond Chegu onterwägs gseh esch. Gäge Obe ine semmer i öisi Hotels z Las Vegas (New York New York ond Monte Carlo) go ichecke ond hend grad mou d'Obe/Nachtstemmig vo Las Vegas chönne isuuge.

Wätter: Sonnig, heiss, ca. 38 Grad

zroggleiti Strecki: 120 Mile

Shopping! Shopping! New York New York

23.05.17

Wöumer geschder Obe leider erscht am 10 ab 12i z'Nacht vorem M&M's Shop gseh send, ond dä om Metternacht zue duet, esch Höt das natürli s 1. gseh womer gmacht hend. Zo üsere Fröid verteilt sech de Shop uf 4 Etage ond die 2. Etage bestoht praktisch nor us sehr farbige Süülene, womer ganz verschedeni M&M's cha säuber is Säckli fölle. Das hemmer öis natürli ned loh entgoh ;-) Ideckt met vöuuuu Schoggi hemmer öis is Casinoläbe gstörzt ond send meh oder weniger erfougriich gseh. Houptsächlech ond öber längeri Ziit hemmer öises Glöck bim Blackjack Outomat versuecht! :-)

Eis vode grosse Highlights do z'Las Vegas hemmer öis för Höt Obe ufgspart: D'Show "Cirque du Soleil Mistère". Die hed am 7ni im Hotel "Treasure Island" gstartet ond mer hend am gliche Tag die Billette chönne zomene vergönschtigte Priis vo ca. USD 80.00 choufe. Vor de Show hemmer öisi Tickets chönne bim Schalter abhole. Die sehr nätti Dame am Schalter hed öis de sogar öisi Billete wo 2. Kategorie gseh wärid, upgraded i die 1. Kategorie. D'Show esch 90 Minute gange ond es esch wörklech e wahnsenns Show gseh! Geniali Akrobate ond super Comedians! :-)

Noch dere super Show semmer denn langsam zrogggloufe zo eusne Hotels ond hend onterwägs no i verschedene andere Hotels Stopps igleid. Z.B. im Venetian, Ceasars Palace, Paris etc. Ou d'Wasserspeli vorem "Bellagio" ond de Vulkanusbroch vorem "Mirage" hemmer öis ned loh entgoh. Bevor mer öis de is Zemmer verabschedet hend, hed natürli e Rondi (oder mehreri) Blackjack ned döffe fähle ;-).

Wätter: Sonnig, heiss, ca. 38 Grad

M&M's Süülene M&M's World Slots Cirque du Soleil

24.05.17

Nochere eher chorze Nacht (was z Las Vegas fascht ned anderscht möglech esch :-)), hemmer eusi Hotels uschecket zom is nöchschte gmeinsame Hotel zfahre (Bellagio) wommer no buechet hend, do mer gmerkt hend das mer jo eigentli gnueg Ziit hend zom e Nacht länger z Las Vegas z bliebe. Bi dene hetzige Temperature esch eim ned so drom dosse lang omezloufe (ond Black Jack-Socht hed eus alli erfasst) ond dorom hemmer de ganz Nomitag bes am Obe i dene verschedene Hotel-Casinos gspöut ond gliichziitig gseh wie die verschedene Hotels usgsähnd. Sehr idröcklech gseh.

Sonnig, heiss, ca. 38 Grad

Casino  Bellagio  Ussecht vom Zemmer Hotel Bellagio

Las Vegas

 

25.05.17

Höt goht eusi Reis wiiter, mer fahred us Las Vegas use ond hend no öbis vor, wo jede Tourescht z Las Vegas "muess" mache. E Haut ond es Foti vom bekannte Schöud "Welcome to Fabulous Las Vegas". Wiiter gohts rechtig Beatty, usere riiese, beläbte Stadt fahremer weder use is "nüt". Wüesti ond 180km gradus... Acho in Beatty hemmer öbis gässe ond die agränzendi Geisterstadt  "Rhyolite" bsuecht. Nochhär hemmer eus ofe Wäg i die nöchscht Onderkonft in Amargosa gmacht. Es härzigs Hotel met Casino ;-) namens Longstreet Inn&Casino. Es esch wedermou ziit zom Wäsche ond echli sii, ond vellecht nochli Black Jack ;-)

Sonnig, heiss, ca. 33 Grad

zroggleiti Strecki: 184 Mile

 

Ghost-Town Ghost-Town Ghost-Town

 

See you soon!

Milli, Chris, Larissa & Martina

 

 

 

Cowgirl’s and Cowboy…..(20.5. - 21.5.2017)

Dienstag, 23.05.2017

20.05.17

 

Noch öisem Abstächer uf Salt Lake City esches Höt planmässig wiitergange rechtig Zion Nationalpark. Das heisst mer send weder ca. 4.5h metem Outo rechtig Süde gfahre, ou das hemmer natürli weder im Navi igäh gha. Ca. 15 Km vorem Ziel hed sech de Asphalt plötzlech i Schotterstross omgwandlet ond es esch emmer steiler worde. Mer hend de es mulmigs Gfüeu öbercho ond hend dänkt, das chas ned sii. Es hed kei Vercher meh gha ond Wägwiiser send ou keini meh ome gseh. :-) Mer hend öis de entschede z’chere ond s’Ziel nomou nöi izgäh. Wöumer bim Zion nor vom Süde här ine chonnt, hemmer de nomou 90 Kilometer wiiter mösse fahre ;-). Doch no im Park acho hemmer öis de uf diräktem Wäg met de Shuttlebüs rechtig Zion Lodge gmacht, womer de ändlech öise Riit-Usflog hend chönne bueche. Wöumer vom lange Fahre scho rächt erschöpft gseh send hemmer de Park no metem Shuttlebus abgfahre. Bimene chorze Marsch hemmer met grossem Schreck sogar no es wiiters Tier entdeckt: E Schlange! Wöumer Morn för öise 3-Stonde-Rett früeh uf mönd, wöuer am 9ni scho startet, semmer aschiessend  zom Hotel Red Lion z St. George gfahre, wo ca. 1 Stond vom Park entfärnt esch. Nochdem mer no es chlises Picknick bsorgt hend före mornig Tag, hemmer im Hotel no e Rondi Ping-Pong gspöut. Mer hed de guet gmerkt, wär i sinere Chendheit e Ping-Pong Tesch dehei gha hed! ;-)

 

Wätter: Sonnig, ca.30° C

 

zroggleiti Strecki: 370 Mile

 

Schlange    Zion NP

 

21.05.17

 

Met riesiger Vorfröid ond chline Ouge semmer Höt Morge ganz früeh ufgstande. Mer send metem voupackte Rocksack los rechtig Zion Nationalpark ond hend öis  pönktlech am 8.45 döffe i Sattu schwenge. Mer send die nöchschte 3 Stond eis gseh metem Ross ond hend eifachheitshauber ou grad ehri Näme öbercho: Shadow, Chester, Kitten, Navahoe. Mer hends öis ned loh näh, zwöschedie echli z’trabe ond uszprobiere öbmer geboreni Cowboys ond Cowgirls send. Gäge Schloss zue hemmers de doch langsam i de Chnöi ond i de Födle afo gspöre (ossert natürli d’Milli, sie esch sech das jo no gwöhnt vo früehner). Noch dem Abentüür hemmers öis ufem schöne Räsali bide Zion Lodge gmüetlech gmacht ond picknickt. Am Nomitag hemmer öis de ufteilt, d’Milli ond de Chris hend die bekannti Wanderig «Angels Landing» gmacht ond d’Martina ond d’Larissa hend de ganz Nomitag verschedeni Wanderige wie de «Riverside Walk», «Emerals Pools» ond d’»Kayenta» gmacht. De Park esch ou weder extrem schön ond beidrockend met sine riesige Steiwänd. Am Obe semmer alli extrem müed gseh vo dem tolle Tag ond send froh gseh omne Duschi ond s’Bett.

 

 Wätter: Sonnig ond liecht bewöukt, ca. 27°C

 

Shadow Chester

Kitten Navahoe Cowboy and Cowgirl's

 

Angels Landing Zion NP Angel's Landing Zion NP

 

See you soon,

 

Milli, Chris, Larissa & Martina

Mer fühled öis wie Dehei (17.05. - 19.05.2017)

Samstag, 20.05.2017

17.05.17

Met Hoffnig uf bessers Wätter weder daser Höt gmäudet hed (Räge ond Schnee) semmer am Morge ufgstande. Chorz nochem Wättercheck hend sech d Milli ond de Chris entschede, e Wanderig dore Bryce Canyon zmache. I dere Ziit hend d Martina ond d Larissa es Usflögli zode Mossy Cave onternoh ond echli entspannt. Trotz dem schlächte Wätter hemmer alli de Tag chönne gniesse. Am Obe hemmer öis förs hoteleigene Restaurant entschede ond hends ned beröit. Alles esch sehr fein gseh ond s'Restaurant hed es rechtig gmüetlechs Ambiente im Westernstyle gha.

Wätter: Räge, Schnee, chaut, ca. 0 Grad

Bryce Canyon Bryce Canyon Bryce Canyon Mossy Cave Mossy Cave

18.05.17

Do Salt Lake City grad no ome Egge esch (ca. 400 Km entfärnt ;-)) ond mer no gnue Ziit hend, hemmer ganz spontan dänkt mer fahrid no det ufe ond verbrengid no zwöi Täg dette. D'Stadt esch ned wörkli tourestisch ond drom gehts ou ned so wörkli e Stadtchärn womer sech cha verwiile. Wasmer ned gwösst hend esch, dass Salt Lake City die 2. gröscht Stadt uf de Wält esch för Religionstourismus (Mormonetum). Z'ganz Utah send 2 vo 3 Lüüt Mormone. Höt öbernachtemer s 1. Mou i dene Ferie imene 4* Hotel ;-) (e grosse Ontersched im Zemmer merkemer zwor ned so wörkli..mer hends bis etz ou emmer guet breicht) :-)

Wätter: Bewöukt, ca. 12 Grad

zroggleiti Strecki: 255 Mile

 

19.05.17

Mer hend gläse, dases ide Nöchi vo Salt Lake City de "Big Cottonwood Canyon" geht. Uf de Föteli im Internet heder usgseh wie e Bärg meteme Seeli ond alles grüen rondome. Womer denn los gfahre send ond mer emmer wiiter ufe gfahre send, lenggs ond rächts met emmer meh Schnee, hemmer langsam gahnt, dasmer öis evtl. chli zwenig warm agleid hend ond das ned sone Früehligswanderig geht, wie mer öis das vorgstöut hend. Womer acho send, hemmer de See fascht ned gfonde, wöuer zuegfrore gseh esch, onder all dem Schnee! ;-) Mer hend dä planti Spaziergang loh sii ond hend die Rueh ond die velle Eichhörndli ond Wisali nochli gnosse. Mer hend öis echli gfüeut, we ide schwiizer Bärge! :-)

Big Cottonwood Canyon Big Cottonwood Canyon Salt Lake Schefere am Salt Lake ;-) Wisali

Wöumer jo z'Salt Lake City send hemmers öis ned loh näh, no i Antelope Island State Park zgoh, wo diräkt am "Salt Lake" liid. Währeddem mer a dem schöne See entlang gfahre send, hemmer näb de Stross sogar zwöi wöudi Bisons entdeckt. Es esch emou idröcklech gseh, e sone Salzsee (27% Salzghalt) vo nöchem zgseh. Mer hend d'Rueh ide Höchi gnosse ond hend weder es paar Sonnestrahle tankt. Weder zrogg ide Stadt, semmer no ome Tämpu vode Mormone gloufe ond hends öis ned chönne verkneife, dors Visitor Center z'loufe ;-).

Wätter: Liecht bewöukt met sonnige Abschnett, ca. 17 Grad

See you soon,

Milli, Chris, Martina & Larissa

 

 

 

Vo eim Naturwonder is Nöchste (14.05. - 16.05.2017)

Mittwoch, 17.05.2017

14.05.17

 

Womer Höt morge onterwägs zom Canyonlands gse send esch plötzli es Usfahrtstäfeli uftoucht vom Arches Nationalpark, wo mer eigentli morn ufem Programm gha hend. Auso hemmer eus chorzerhand entschede de Arches NP vorzzieh ond dä zerscht zmache. Det hemmer de vell verschedeni Arches (Steiböge) gse ond hend no e chorzi (5km) Wanderig onternoh. Völlig erschlage ond hongrig hemmer denn ufem wäg zo eusere nöchste Onterkonft z Green River, bim Denny’s (Restaurant) no chorz halt gha. Mer send etz wäred eusere ganze Reis scho paar mol ah dem verbi gfahre ond hend emmer gseid dasmer det mol wend go ässe. Leider mömmer do dezue säge dasmer dä scho vöu vöu gliner hätted sölle usprobiere, är esch nämli MEGA! Gstärcht semmer denn ih eusere Onterkonft (America’s best value inn) ahcho, wo eus de Chris denn no Black Jack erklärt hed. Schliesslech wömmer jo denn z Las Vegas eusi Feriekasse nochli ufbessere ;-) Morn wärde mer denn wie vorgse no de zwöiti Teil vom Canyonlands mache, wo mer denn leider weder 1h retour wärdet mösse fahre. Aber mer hend jo zom glöck gnue Ziit ;)

 

Wätter: agnähm warm, sonnig met paar Schleierwolke ca. 26 Grad

 

Zroggleiti Strecki: 199 Mile

 

Arches Nationalpark Arches Nationalpark Arches Nationalpark

 

15.05.17

 

Höt semmer alli chli müed ufgstande. Das cheibe Black Jack hed eus ned früehner is Bett gloh ;-).

Nochere guete Stond Autofahrt semmer denn doch no bim Canyonlands NP acho. Höt hed aber niemer möge gross go wandere (ossert de Chris). Auso hemmer eus entschlosse eifach die verschedne Ussechtspönkt zgniesse. Ome Mettag ome semmer denn bereits scho döre gseh ond hend eus ufe Wäg gmacht noch Panguitch. Mer hend gwösst was uf eus zuechond: ca. 4.5h Autofahrt.. Aber mer fahred ganz nochem Motto: De Wäg esch’s Ziil ;-). Wie emmer semmer mega gspannt gseh uf öisi Onterkonft. Dasmou bsonders, wöumer wärdid drü Nächt dette verbrenge. Ou dasmou hemmer es guets Händli gha bem bueche: D'Onterkonft (Quality Inn) esch im Westernstil bouet ond rondome nor Natur. Ond das nor 20 Minute vom Bryce Canyon entfärnt.

 

Wätter: Sonnig, warm, ca. 22 Grad, am Obe Räge

 

Zroggleiti Strecki: 360 Mile

Quality Inn, Panguitch Canyonlands Canyonlands Canyonlands

 

16.05.17

 

Nocheme feine, gmüetleche z'Morge semmer ab rechtig Bryce Canyon. Wedermou usgröschtet met länge Hose ond Jagge im Gepäck. Leider esch Höt s'Wätter sehr onsecher, drom hemmer öise Riitusflog leider noni chönne mache. Mer versuechid de öises Glöck vorussechtlech weder im Zion Nationalpark. Höt semmer auso vorwiegend metem Outo onterwägs gseh ond hend die idröckleche Fäusformatione im Bryce Canyon bestuunt. Mer hend üs de plötzlech sehr gwonderet, dases tatsächlech weder hed afo schneiele! ;-) De Wätterbrecht hed doch agäh, es wärdi öppe 14 Grad..Mer hend aber natürlech ned dra dänkt, dass de Bryce ca. 2500 m.ü.M. liid. Zom Glöck esch das aber nor vo chorzer Duur gseh ond de Schnee hed ned agsetzt. Ou do gsämmer fascht jede Tag nöii Tier, womer no nie gseh hend, wie z.B. Chipmunks ond Antilope. Nocheme chorze Marsch i Canyon abe semmer no förne chorze Abstächer is Visitor Center go e Föum luege öbere Canyon ond gäge Obe ine semmer in Panguitch öpis guets go ässe.

 

Wätter: Alles echli, vo Sonne bis Schnee, ca. 12 Grad

 

Bryce Canyon Bryce Canyon Bryce Canyon Chipmunk im Bryce Canyon Antilope (Pronghorn), Bryce Canyon Bryce Canyon

 

See you soon,

 

Milli, Chris, Martina & Larissa

Antelope Canyon / Monument Valley / Canyonlands (12.05. - 13.05.2017)

Sonntag, 14.05.2017

12.05.17

Höt Morge semmer los rechtig Antelope Canyon. Dä werd vode Indianer gfüehrt ond dorom hemmer leider relativ happigi Itrettspriise mösse zahle, zom dä go azluege. Pro Person sends 33 Dollar gseh, ond Ziit esch begränzt gseh uf ca. 1 Stond womer denne hed chönne verbrenge. De Canyon säuber esch aber extrem idröcklech, wöumer sech dor ängi Fälsspalte schlänglet ond wie e "ontererdische Gang" us Fälse cha doreloufe. Trotzdem fendemers mega schad, dass de Priis so höch esch, vorauem wöu alli andere Nationalpärk sehr gönschtig send zom bsueche.

Mer hend üs entschede, wöumer no gnue Ziit hend, ide nöchste Täg no de Canyonlands ond de Arches Nationalpark zbsueche. Drom hemmer öis ufe Wäg gmacht rechtig Bluff, wo öisi nöchst Onterkonft (Kokopelli Inn) werd sii. Onterwägs hemmer de no e Abstächer is Monument Valley gmacht, womer wedermou öberne rechtigi Schotterpischte hend döffe fahre ;-) Aber ou do semmer secher dorecho, Chris sei dank! :-)

Wätter: Sonnig, heiss, ca. 30 Grad

zroggleiti Strecki: 204 Mile

Antelope Canyon Antelope Canyon Antelope Canyon Antelope Canyon Antelope Canyon Antelope CanyonMonument ValleyMonument Valley

13.05.17

Nochere gmüetleche Nacht i öisere schöne Onterkonft z'Bluff (met ca. 10 Hüser rondome ;-) ond vellne schöne Bärge) hemmer öis ufgmacht rechtig Canyonlands. Mer hend de afi de Südteil vom Canyonlands erkondet, ond de Nordteil wärdemer Morn am Morge besechtige, wöu die leider ned metenand verbonde send. Öbernachte düemer Höt in Monticello im Canyonlands Motor Inn.

Wätter: Sonnig, heiss, wendig, ca. 29 Grad

zroggleiti Strecki: 165 Mile

Newspaper Rock Wooden Shoe Arch, Canyonlands

See you soon,

Milli, Chris, Martina & Larissa

Es schneielet, es beielet..... (09.05.17-11.05.2017)

Freitag, 12.05.2017

09.05.17

 

De Wätterbrecht för die nöchschte zwe Täg gseht ned so rosig us. So semmer am Morge ufgstande ond zerscht gmüetlech im ihop go zmörgele. Es hed grägnet, ond grägnet… Womer losgfahre send rechtig Grand Canyon hemmer gmeint mer gsähnd ned rechtig.. De Räge hed sech i Schneee verwandlet! Je meh Schnee sech agsetzt hed, desto nervöser semmer worde met eusne Sommerpneu. Mer hend vor eus ond hender eus nüd anders gseh als Wald, Wald ond nomou Wald. Zo eusem Glöck hed sech noch öbe 40km Fahrt de Schnee i Räge omgwandlet ond mer hend eus alli weder chönne entspanne.

Acho im Grand Canyon hemmer wie vermuetet leider zemmli nüd gseh ond hend entschlosse, i euses Hotel zgoh, echli z verwiile ond die wiitere Täg z plane. Zom Glöck hemmer s Hotel ca. 1 km vom Grand Canyon entfärnt ond i dem Dörfi namens Tusayan heds es Imaxx Kino gha womer am Obe no de Film "Grand Canyon" send go luege. De hemmerne emmerhe afe of de Liinwand gseh ;-)

 

Wätter: Störmisch, Räge, Wend, Schnee!!, chaut, ca. 0 Grad

 

zroggleiti Strecki: 130 Mile

 

Grand Canyon Schnee!!

 

10.05.17

Wöu mer eus geschder entschede hend, dasmer secher bes am donschdig bim Cran Canyon bliebed, wöu de weder sonnig söu sie, hemmer eusi sache packt ond send us Priisgrönde is Hotel näbedra izoge. Bevor dasmer de ändlech de Grand Canyon Life döfe gseh, semmer zerscht zom Floghafe, wommer de lang ersehnti Helikopterflog öbere Crand Canyon buechet hend för am Donschdig morge. Aschliessend semmer de ganz Tag met de gratis Schuttlebüs im Park omegfahre ond hend die verschedene Ussechtspönkt bsuecht. Emmer weder hemmer zwösche de Böim Elche entdeckt, wo am frässe ond trenke gseh send, wöus Geschder so vöu grägnet hed. Söscht gseht mer die sehr sälte, aso hed das schlächte Wätter doch ou sini gueti Siite gha ;-) Zwöschedie hemmer eus nochli sportlech betätiget ond send vom einte ponkt zom andere gwanderet ;-). S Wätter esch besser gseh als geschder, aber leider emmernoni so wiemmer sechs wönscht.

 

Wätter: Bewöukt, wenig Räge, ca. 12 Grad

 

Elch Grand Canyon

 

11.05.17

Meteme Grense im Gsecht semmmer ufgstande ond los rechtig Grand Canyon Floghafe. Stahlblaue Hemu ond agnähm warm. Pönktlech am 08.00 Uhr semmer metem Helikopter abghobe ond hend atemberoubendi 45 Minute erläbt. Weder am Bode acho semmer öberglöcklech zrog is Hotel, hend eusi 7(0) Sache packt ;-) ond hend euses Reisli fortgsetzt. Euses hötige Ziel: Page, wo ide nöchi vom Antelope Canyon esch. Bevor mer i öisi nöchst Onterkonft, Super 8, send go ichecke, hemmer e Abstächer zom Horseshoe Bend gmacht. Dette heds öis de grad weder us de Socke ghoue, bi dem geniale Ableck! Mer wärdid Höt Obe nomou änefahre ond dette de Sonneontergang go gniesse. :-)

 

Wätter: Sonnig, warm, ca. 25 Grad

zroggleiti Strecki: 141 Mile

 

Öise Helikopter Grand Canyon

 

See you soon,

 

Milli, Chris, Martina & Larissa

 

 

ändlosi Wiiti (07.05. - 08.05.2017)

Dienstag, 09.05.2017

07.05.17

Höt Morge hemmer e chorzi Wanderig vo ca. 6.5 Km im Joshua Tree gmacht. Aschliessend hemmer Höt vorallem e "Fahrtag" vor öis gha. Es Highlight vo dem esch secher de Abschnett uf de Route 66 gseh. Onterwägs hemmer imene rechtig schöne "Westerndörfli" Namens Oatman e Stopp igleid, wo sogar wöudi Esle uf de Stross läbid. Emmer weder hemmer haut gha, om die schön Landschaft chönne zgniesse. Emmer weder fahremer Kilometerwiis gradus ohni dass ergend e Zivilisation sechtbar esch. Das hend mer eus aus Bewohner vode öberbevöukerete Schwiiz i dem Usmass gar ned chönne vorstelle. Öbernachtet hemmer z Kingman, wedermou im Motel 6 ;-) ond acho im Bondesstaat: Arizona!

Wätter: sonnig & liecht bewölkt, ca. 15 Grad

zroggleiti Strecki: 237 Mile

Route 66 Im Joshua Tree N.P. On the road.. Oatman - Finde den Esel ;-) Oatman Oatman Route 66

08.05.17

Womer Höt im Navi euses nöchste Ziel Sedona igäh hend, hemmer ou ned schlächt gluegt, wo gstande esch: 233 Km gradus :-) Onterwägs uf dere schöne Strecki send emmer weder Warntäfali cho, wäg mögleche Elchöberquerige. Ned lang esches gange, besmer vo wiitem eine gseh hend uf de Stross omespaziere. D'Milli hed ofs Gas dröckt ond bevor daser im Waud verschwonde esch, hemmer no e Bleck chönne ufne wärfe. Leider heds förnes Foti för öich noni ganz glänget ;-). Noch öisem Fährtli dor Waudlandschaft, womer s Gfüeu gha hend mer seige z'Kanada, send plötzlech roschtroti Fäuse vor öis uftoucht. Es atemberoubends Böud! Z'mettzt drenne liid das schöne Dörfli Sedona, wo öis öisi Reiseberoteri empfohle hed. Danke före Tipp! :-)

Mer send de dette omegflaniert ond hend die idröcklechi Natur gnosse ond öpis gässe. Mer send noch paar Stond zrogg rechtig Flaggstaff gfahre womer ou öisi Onterkonft hend, damet mer Morn gli mou bim Grand Canyon send.

Wätter: wächsuhaft met Sonne ond Räge, ca. 18 Grad

zroggleiti Strecki: 209 Mile

Sedona Sedona Sedona On the way to Sedona

See you soon,

Milli, Chris, Martina & Larissa

Noldis are Goldies ;-) (05.05. - 06.05.2017)

Sonntag, 07.05.2017

05.05.17

Höt hemmer eus meteme chorze Bsuech im Balboa Park vo San Diego verabschedet. Vom grüene Balboa Park semmer nochere Stond Outofahrt ide stoubtrochne Wüeschti vo Salton City glandet. Ehr chönnd öich die City ongföhr so vorstelle: Vöu verlassni Hüüser ond Wohnwäge ond vom z'höche Salzghalt vom Salton Sea verändeti Fesch ond Vögu. Blüeteziit vo dere Stadt esch sett 50 Johr verbii, do send Toureschte ufem See no Wasserski gfahre ond de Tourismus hed boomt. Es gseht us wie inere Geischterstadt, wo alli möglechst rasch hend wäg wölle. Noch dere Reis id Vergangeheit semmer wiitergfahre ond hend öisi Onterkonft z'Indio im Motel 6 gfonde, wederemou ;-). De Obe hemmer am Pool no meteme "Tschau Sepp" loh usklenge. Ond je länger dasmer gspöut hend, desto meh esch us de "Nulldies", "Goldies" worde ;-). Ned emou meh Alkohol hets bi dene Temperature (öber 40 Grad!!) brucht.

Wätter: Sonnig, brüehend heiss!!, öber 40 Grad

zroggleiti Strecki: 177 Mile

Milli & Martina vermessid s'Potze.. ;-) Salton Sea Geischterstadt Salton City

06.05.17

Am haubi 10ni semmer z'Palm Springs im ihop ghocket ond hend fein zmörgelet. Wöus dette aber ned vöu anders gäh hed zom aluege, semmer de gli wiiters rechtig Joshua Tree Nationalpark. Dette hemmer grad de Nationalpark-Pass glöst, wo eus berächtiget i fascht jede Nationalpark zfahre ond das för nor USD 80.00 (pro Outo!!). E super Sach! De Joshua Tree esch extrem schön, mer hendne aber nor afi metem Outo abgfahre ond wärdid Morn dette no e Wanderig onternäh. Am Obe semmer is Rib & Co. z'Twentynine Palms go es feins Steak ässe. D'Onterkonft Höt hemmer im Motel 9 Palms Inn, wo nor ca. 9 Kilometer vom Joshua Tree entfärnt liid.

Wätter: Sonnig, heiss, ca. 29 Grad

zroggleiti Strecki: 121 Mile

Joshua Tree Nationalpark Joshua Tree Nationalpark Euse hötigi iHop zmorge :)

See you soon,

Milli, Chris, Martina & Larissa

Auf dieser Seite werden lediglich die 10 neuesten Blogeinträge angezeigt. Ältere Einträge können über das Archiv auf der rechten Seite dieses Blogs aufgerufen werden.